viernes, 3 de junio de 2022

Rumbu al norte

De la rosa de los vientos
al aldu del lliriu en flor.
Rumbu al norte.
Llevantando los anclaxes del pasáu.
Resalvando bramadorios de Neptunu.
Encarando vagamares.
Empixando pataricos.
Rumbu al norte hasta embarbiar
colos cantiles de xelu.
Onde por ti naide espera
Onde la nueche ye blanca.
Onde la brisa taraza.
Onde l'home namás ye home
y el corazón, solu, asela
teniendo un iglú por patria.
De la rosa de los vientos
al aldu del lliriu en flor
hasta'l confín de la tierra.
Onde'l turullu de guerra
naufraga xunto a la historia.
Onde, metanos la mar,
nun algama la memoria.
Onde'l futuru ye olvidu
y l'olvidu n'alma añera.
Al aldu del lliriu en flor
allá, siempre rumbu al norte.
Onde la nada rescampla
y l'ausencia faise plena.
Onde somorguia la foca.
Onde sopla la ballena...


viernes, 26 de noviembre de 2021

Semiente máxico

Camín del molín nun ye raro qu'atopéis al diañu burllón.
Y dientro'l molín tampoco nun ye raro qu'atopéis al trasgu.
Porque la imaxinación y los suaños esisten.
Y si'l diañu burllón ya'l trasgu tán na imaxinación y nos suaños, entós esisten tamién.
Y nel molín onde ronden el diañu burllón ya'l trasgu
muelse la semienta máxico de la imaxinación y los suaños
d'aquellos que tienen, dientro de sigo, un llugarín acutáu
p'atesorar tan preciada molienda.

domingo, 21 de noviembre de 2021

Nortiando

Arroxando fornaes de mañana, de mañanes y 
d'albancia y de pallabres seles como güeyos serondos.
Tresnando'l pan pa matar la zapera de los suaños,
de les rises afogaes, de los díes buxos de ñuberos y medrana.
Qu'hai un tayuelu pa cadún nesta posada. 
Y hai escudiella y pan, y calor de llar y pallabra pacetible.
Desalienda, viaxeru fatigáu, viaxeru d'otres dómines
au suañar costaba un corazón d'enfotu.
Desalienda y agüeya selequino'l tiempu que t'afalaga,
esa interminable riestra d'historia por facer y tresnar, 
por iguar coles tos manes d'alfareru infatigable,
d'artesanu de la paz, d'apurridor de díes ensin povisa
y nueches de ruxerrux y lloréu...
Que mañana hai un camín y un horizonte.Que mañana hai una andecha y un tiempu pa xorrecer amigances.
Qu'hai cantares, y foguera, y folixa, y xuntanza...
Y manes xuncíes a manes, y pallabres con pallabres.

miércoles, 17 de noviembre de 2021

Añada

"Ea, ea,
el carru cola yerba...".
Cola parexa xuncida col chuscu lloriame
caminando sele, solemne, acompasada.
"...Vaya, vaya,
el carru cola paya".
Apináu y cantando pela carril soleyera,
arrecendiendo a siega camín de la tenada.
"Ea, ea,
vaya, vaya...".
Alita l'alcordanza añicada nel somantu
de la tierra llariega, buscando l'alborada.
"...El carru cola yerba,
el carru cola paya".

martes, 2 de noviembre de 2021

La Partida

Ganar pa la mano. Ganar pal pulgar.
Facer darréu bolos. Cutir y cuatriar.
Tirar con enfotu. Xugar p'algamar.
Frayar los pilancos. Puxar y avanzar.
Poner altu'l ramu. Salir p'andechar.
Llograr la fazaña. Danzar y rinflar.
 
 

martes, 12 de octubre de 2021

Asturianada

Asturianada gayera, 
muga viviega,
celta sormiellu.
Alto la lleva, cimera,
xixa llariega, 
brenga d'Urriellu.

jueves, 20 de mayo de 2021

Los reloxes centenarios

Los reloxes centenarios tienen el so aquello.
Camientes, dacuando, nes hores que contaron
a los antepasaos que yá nun tán.
Agora cuenten les tuyes y cúrieslos con procuru.
Y pienses si, en faltando tu, 
siguirán dayures contando les hores
o si acabarán nel sumidoriu de los trastos inservibles.


jueves, 1 de octubre de 2020

Amagüestu

Cuando los antiguos de casa yá sumieron
y cuando la morada de suyo esfarrapó valtada,
apálpeste solu nortiando pal to finxu'l cielu.
Camines entós una alborada pela viesca,
que, como la morada, tamién fuera de los antiguos finaos
y repares nes vieyes castañales chamuscaes y vives
que van echando oricios como pimpanes de seronda.
Somórguieste entós nel vieyu ritual de la rebusca,
como nos tiempos d'antaño onde les castañes cocíen
en llar o tresnaben en fornu pa matar la fame
y escalecer los cuerpos nos tiempos buxos y duros.
Na nueche sele, sigues col ritual del amagüestu y vas espellicando
l'ambozada que pañasti al ñacer el día trepando a la gueta,
y pónes-y el ramu al vieyu ritual qu'entamasti en monte
comulgando colos finaos d'antiguamente, cola morada
valtada, cola viesca centenaria, cola güelga trazada...
enfotáu en redimir la soledá y los recuerdos
que t'afalen nuna vida que yá cuentes per serondes.

miércoles, 16 de septiembre de 2020

Geisha

Ñaz pel oriente l'albancia
como geisha pola y sele.
Rellumen bixos de nacre
nel somantu la rosada.
Allá, nun requexu'l monte,
cabo la vieya pasera,
bocia una texuca ñueva
sol burbús de la enramada.

jueves, 21 de mayo de 2020

Corsarios llibre pensadores

Namás que los corsarios llibre pensadores
son a entender les sinfoníes secretes de les serenes.
Poro, nes agües onde ñaveguen, naufraguen desarbolaos
los cascarones de los mediocres sectarios.