viernes, 16 de diciembre de 2016

Olvidu eternu

Nun vas tornar a ñacer fundíu nel cutir polvorientu de la to cadarma. Secos yá los raigones de la vida. Llendáu nel to espaciu de soledá y silenciu.

Nun van tornar los tos güeyos a ver la lluz nes tardes seles de seronda, nin caleyar pela viesca, nin estelate na mar.

Nun vas tornar a ñacer, nin güeyar al sol escucando na xamasca, nin ver el cielu, nin les ñubes, nin la muga...

Pero nun t'esmolezas que tampoco nun va haber infiernu dalu, nin verdá, nin mentira. Nenyures atoparás aire, nin clariar, nin tapecer:

Vas ser namái povisa donda apigazando nel olvidu eternu.

Asina qu'escaezme. Porque voi ser como tu. Povisa y olvidu. Y nun t'enchipes. Porque vas ser como yo. Olvidu y povisa.

Voi llevar pal mio cagüercu les mios alcordances. Como la de Miliquín l'hoh.alateru montáu na bicicleta en madreñes camín de la plaza a vender los moldes que tresnare nel so cuartu convertíu en taller.

O como aquel dir pa la escuela en zapatielles y chanclos cola xelada dexándote talludes les piernes albintestate por mor d'aquellos pantalones curtios nel iviernu.

O como la xente mayor que dexaron güelga nel mio ser cuando  neñu y qu'hoi yá tán muertos.

Asina que nun t'esmolezas por min. Allá un día voi ser como tu, povisa y olvidu.

Escaezme.

Porque enfótome que, en morriendo, va haber daquién anónimu que, allá na Nueche d'Ánimes, va prender una calavera na cruciada del camín que me guíe al mio escaniellu, a los caminos que percorrí na mio vida, a los llugares que mozcaron la mio alcordanza, a les vivencies que tresnaron lo que fui.

Y, con eso, voi algamar la plenitú del mio cuerpu camudáu en polvu d'estrelles.

Y, si acasu daveres esiste eso que llamamos l'ánima, la plenitú de la miuya, camudada nuna enfilandrada  de vivencies propies cuando yera vivu, úniques ya irrepetibles.

viernes, 2 de diciembre de 2016

Home Namoráu

Yera un home namoráu

de los xatos pintos

y les albóndigues.

Sopelexáu pol mingu

y l’aforfugu de final de mes.

Yera un home eleváu

a la enésima potencia

pol rioxa collecha 96.

Y acuruxáu tres los papeles

sentía ruxir nes vidayes

l’ensame ultrasúdicu

de los héroes del

                               F

                                 O

                                    O

                                        T

                                            B

                                               A

                                                    L

                                                        L



   

domingo, 20 de noviembre de 2016

El País de Nenyures

Dende’l ventanu’l mio camarote
nortio la mar.
Una mar que ruxe bella.
Gaviotes y tolines siguen el barcu
que bancia, adulces,
hacia’l País de Nenyures:
onde nun hai tierra,
nin agua,
nin orielles.
Xubo sele pa cubierta
anubríu pola desgana,
pues rescampla güei un sol
de manera irrepetible.
Por cierto,
allá en País de Nenyures,
tampoco nun hai sol,
nin lluna,
nin estrelles.

domingo, 13 de noviembre de 2016

Princesa Llagartesa

D'otros díes la memoria pecigaña
nos blasones de la piedra aforoñada,
y la edra caprichosa escarabaya
la silueta de la torre aldovinada.

Ye princesa del palaciu, llagartesa,
caleciendo na corrada soleyera,
y apregona don cuquiellu a so alteza
la llegada de madama primavera.

martes, 18 de octubre de 2016

Silencios

Guaña'l silenciu dayures.
Erma la tierra nes manes.
Rance'l coral.
Rance'l tiempu
orpinando nes vidayes.

sábado, 8 de octubre de 2016

Cosadiella

Xuntos vamos pel camín
como la gaita ya'l canciu,
andando yo, tu al rau míu,
yo facieno, tu imitando,
voltiando yo selequín,
tu, foína, llueu tornando.
Mas, teo de reconocer
qu'endagora na mio vida
enxamás fui p'atopar
fidelidá o xermandía
qu'a ti se pueda oldear.
Siempre sele, silenciosa,
tapecida, arrequexada...
pola escuridá frayada
y sol farol pergociosa.
Mialma, si nun yes tu,
nes nueches vilbes d'enfotu,
un remiendu pal mio rotu
y un sonce ecu de lluz.

miércoles, 28 de septiembre de 2016

Canciu Nocturnu De Serena

Ye la nueche somantu afayadizu
p'amar na soledá a una Serena.
Sintir la perceguera de les hores
pingando na piel del alma que na velea
vaga nuna romandela interminable.
Mentes la escuridá anubre'l cuartu,
xuxuria nalando'l canciu d'esa Serena
que cadún llevamos con nós
naguando infantilmente por dexanos empixar
hasta encallar nos cantiles de los deseos muertos.
Ye perfácil decatase nel somantu de la nueche
de que l'infiernu esiste realmente.
Ellí amiyen rotos, glayando, tarazaos de dolor,
los corazones inocentes qu'embarcaron un mal día
ofreciendo gayoleros el sonsón de los sos valtos
a les serenes lladrones de los amores imposibles.

jueves, 7 de julio de 2016

Piel de Lluna

La buelga pela to ñeve,
hacia ti, rastru ensin sen,
col calicor de saber
que ye nidia,
piel de lluna,
nueche sele,
la to ausencia.

jueves, 26 de mayo de 2016

Na Herbosa

Buxa, la tarde bruxa,
bocia en silenciu.
El to asemeyu
y un garrapiellu
de corazones
franciendo espeyos.
Suaños d'orbayu
texe'l recuerdu.

jueves, 12 de mayo de 2016

Ocle Y Seronda

El pulsu les foles amorrenta
como sele esfoyaza nes tardes de Setiembre.
Güel a ocle y seronda,
a cachones referviendo nes quietes manes del xigal.
Y unos güeyos silenciosos tresbilden
el nidiu azul del horizonte.
Retriñen voces engaramitaes nel aire
y les nubes, nel pasar adulces de los suaños cansos.
Les guedeyes ondeen al sol mortecín, espelurciaes,
feches remontáu deséu,
y afalaga la piel la sonce voz de la fresca.
Entemécense semeyes y pensamientos, rixos y calmes,
nagües y besos, y siempre unos güeyos
tresbildando horizontes.
Manes con manes n'enxareyada, pallabres con pallabres,
un burbús esbaria afalagando la roxa melota
del sableru.
Y allalantrón preguntes y un cuetu, y un cielu
escampláu, y un arniu de lluz ariciada d'esperanza.
Xuega l'amargor al piocampu coles lluces
fríes y murnies de faroles quedes na tarde
de tebia paz.
Un tastu a salmoria recuerre la distancia,
y un camín, pobisa y tiempu, inunda'l sen de recuerdos.

lunes, 11 de abril de 2016

Camín De Primorias

Camín de Primorias
onde tou é llar:
bramadoriu, vega,
sable, h.ou, cumal.
Peñatú sagráu,
máxicu Pindal,
totémicu Urriellu,
h.oguera ritual.
Camín de Primorias
onde tou é llar:
danza, corri-corri,
reh.inchu tribal,
toñada d'ancestros,
bierzu nacional.
Santa Cruz, Cuandonga,
cagüercu real.
Camín de Primorias
onde tou é llar:
de texu la brenga,
somantu vital.
U en güeyu ente'l moh.u
l'agua ñaz candial
y guardan inxanas
suaños de coral.

miércoles, 9 de marzo de 2016

Xuglar De Posafuelles

Xuglar simplemente soi
de posafuelles.
Buscando pallabres voi
peles caleyes.
Llamáime siempre xuglar,
nunca poeta.
Llevántome col riscar
y ando a la gueta,
pel castañéu la llingua,
pa echar na cuerria.
Nun me llaméis escritor,
siempre xuglar.
Toi na braña col pastor,
na llosa col llabrador,
y col pescador na mar.
Sabéi cómo me llamar:
de posafuelles cantor, 
cenciellamente, xuglar.    

sábado, 13 de febrero de 2016

Xeriátricu

Y recordó entós aquel día en qu'olvidó la dignidá 
colgada d'un gabitu l'horru.
Y arrenegó de la cuna que lu añó, de la lleche que mamó,
de los cancios qu'escuchó, de la llingua que faló...
Y apostalgáu nel sillón del xeriátricu
decatóse de que viviere una vida ayena,
que fuere una marioneta d'otres cunes, d'otra lleche,
d'otros cancios y d'otra llingua...
Y tresaleció entós por vivir la so vida propia...
Pero yá yera tarde.
Mui tarde. 
Mortalmente tarde.

lunes, 8 de febrero de 2016

Antroxu

Febreru traxo l’antroxu,
los guirrios y la comedia.
Mazcaritos, goxu ardiendo,
pitances, trebeyos, fiesta.
Darréu, vien entainando
el desiertu la cuaresma.
Y, nun bierzu cerezales,
tresalez la primavera.

viernes, 29 de enero de 2016

Vis-Veo

Vis-veo, neña, y verás...
a tatás...del gris grisor
del llau del corriverás...
cuntando santos quiciás...
chirlosmirlos...menos dos...
¿Pescanciesti p’acullá,
pintu o prietu, cuál color...?.

sábado, 2 de enero de 2016

Renombranza

Muga
na tierra sechada
u duerme l’amor.
Na erma corrada
de vacíu dolor.
Nos güeyos fuxíos.
Nel recuerdu
murniu
d’un persele son.