Nocherniegos besos d'ayeri

Allumen entientes les faroles -gates de lluz espoẍigaes- la ciudá dormida.Curien la velea d’albancies d’arniu llandiu de yelsu.

Llindien borrachos d’enfotos tresmanaos en mercáu la fueya, bohemios de poesía amugada en rioẖa tinto, guaños del galipote y snobs coritos colgaos dafechu nes colgadielles de metal rellumante como güeyos de muxín.

Finxen les faroles la nueche: cuando l’aforfugu del run-run y la povisa s’espreceta pelos requexos olvidaos y les solombres pinguen los silencios.

Candonga la soledá. Perdayuri arrecienden les cloaques, madres y fíes, añada y trubiecu, hermanaes eternes col destín, remanecíes nel caín de los sos vafos de sueñu.

Surde l’agua prieto… Surden ñegrures nos pensamientos… ambozaes d’años amoreciendo coles muries…

 Alón, ciudá: mañana, tornaremos amestanos la mio carne y el to asfaltu.

La verdá que nos fai llibres

   Vivimos engañaos desque ñacemos

   y, malpenes estrenamos les neñines,

   yá nos cambien les mamielles por un chupu.

   Andamos namoraos desque podemos

   y llevamos bien dispuestos en gargüelu

   un cantar y un ixuxú pa echar al mundu.

   Filamos tolo fino que sabemos

   y texemos mil barayes colos años

   pa evitar que s'esfreza'l pensamientu.

   Y, a la postre, abangaos d'upar a otros,

   les mamielles celestiales añoramos

   espurriendo'l pescuezu nel cagüercu.

          
       

El Suañador Vagamundu

Cuandu na nuachi seli las estrellas chisgaban nel cialu

un barcu de velas esgayadas atracóu adulcis nel mualli.
Era la navi del Suañador Vagamundu, qu’un viayu
llobu de mar pixuatu me cuntari cuantayá nuna nuachi de velea.
 Saliarun entoncias bisarmas blancas comu faloupus
que fuarun espardiándusi pelas caleas valeiras
hasta amatagasi colas solombras.
De siguíu, una bluma trupa avanzóu pela mar
ya entróu nel puablu hasta anubrir la casa’l fuau de lus suañus
deixandu güir sólu’l febli burbús de la mar bella.
Cola alborada, lus bardus saliábansi mudus colas caras pálidas
ya lus guayus ingriantus nas sous pozas renigridas.
Ya miantras las bisarmas mariñeiras bociaban
desdeixadas xugandu al mus so lus curadíus,
lus nuastrus suañus muartus iban ya vinían comu la ocla
que las folas deixan beisándunus lus piais.

Esfoyaza

Xugaba a que la lluna yera una cometa.

Atopó la so infancia intauta nel vientre d'una matriuska.

Les gates de lluz son les constelaciones de los bardiales.

Taba'l camín tapizáu con pétalos de recuerdos.

Les llámpares son los sombreros chinos de los pedreros.

Los grillos son los bardos de los praos.

Nel somantu la tristura gargoliaben los xilgueros.

Los llíquenes son les barbes de pequeños druides que vinen nos árboles.

Pecigañaba la tarde bociando rellumos nel finxu'l cielu.

Cuandu tresllumbas...

  Cuandu tresllumbas el cumal que ti fiandi

  en dous mitadas la tou vida,
  entamas a ver lus feichus que viviasti
  comu’l recuantu d’una amuravela.
  Emprimas na cuna ya vas percorriandu adulcis
  lus requeixus de tolas caleas que triasti
  ya tamián daquellas qu’enxamás pasarun
  más allá de la puarta’l tou deséu.
  Camiantas entoncias si tovía ya tiampu d’atroupar
  lus montis,  vallis ya mariñas au nunca
  inda aprucisti. Peru ya entoncias cuandu’l  pesadiallu
  que ti aforgugóu tantus ya tantus suañus
  déixati amorrentandu comu un esculibiartu
  nel sabli de la nada,  ya pescancias que ya seru
  pa ser lu que nun fuisti ya vivir tou aquellu que 
  namái ya ferial de las tous ilusionis amortayadas.

Mester de xuglaría

Toca'l xuglar,

trasiega'l rei,

trebeya'l conde,

blinca'l bufón

ya'l pueblu vive por nada

en pernada. 

Canta'l xuglar,
refalfia'l rei,
revicia'l conde,
galde'l bufón
ya'l pueblu muerre en pernada
por nada.

Cuatriada celeste

Cuando truena, dicen que son los ánxeles

que tán xugando a los bolos allá nel cielu.
Concretamente, cuatriada, y eso ye una certeza
fácilmente demostrable.
Sabemos si tiren pa la mano o pal pulgar
según d'aú vien el ruxerrux de los bolos acutíos.
Sabemos si tán faciendo munchos o pocos bolos
pola intensidá de la truena cuando los valten en castru.
Sabemos cuándo cambien de llau'l bichi
pol silenciu que se nota mientres lu mueven.
Y, finalmente, sabemos cuándo acaba la partida
polos rescamplíos qu'allumen el cielu:
son los voladores que llancen, gayoleros, l'equipu ganador.

Antroxu

  L'iviernu traxo l’antroxu,

  los guirrios y la comedia.
  Mazcaritos, goxu ardiendo,
  pitances, trebeyos, fiesta.
  Darréu, vien entainando
  el desiertu la cuaresma.
  Y, nun bierzu cerezales,
  tresalez la primavera.

Os Teixois

Alló,

na tierra u’l ferreru
forxa sele'l tiempu
nel mazu y la fragua.

 Alló,
 nel llar au’l viaxeru
 descansa esteláu
 sol cielu pizarra.
                      
  Alló,
  onde al sol primeru
  bancien corazones
  al compás del agua.